ភ្នំពេញ៖ រដ្ឋលេខាធិការ និងជាអ្នកនាំពាក្យក្រសួងបរិស្ថាន លោក នេត្រ ភក្ត្រា បានលើកឡើងពីការប្រមូលសេវាអនាម័យបរិស្ថានដើម្បីចូលរួមដល់ការគ្រប់គ្រង និងការពារបរិស្ថាន។ លោកបន្ថែមថា ទៅថ្ងៃខាងមុខក្រសួងក៏នឹងគិតគូរពីការការប្រមូលសេវានៃការប្រើប្រាស់ទឹកផងដែរ។

ថ្លែងក្នុងសន្និសីទសារព័ត៌មាន ព្រឹកថ្ងៃអង្គារ៍ ទី៣០ ខែសីហានេះ លោក នេត្រ ភក្ត្រា បានថ្លែងថាលោកនឹងធ្វើការបន្ថែមទៀតជាមួយមន្ទីរបរិស្ថានរាជធានី-ខេត្ត ដើម្បីជួបជាមួយម្ចាស់ភោជនីយដ្ឋាន ម្ចាស់សណ្ឋាគារ ដើម្បីពន្យល់ពីមូលហេតុដែលរដ្ឋត្រូវប្រមូលសេវាអនាម័យបរិស្ថាននេះ។

លោកបញ្ជាក់ថាការប្រមូលនេះគឺដើម្បីជាការរួមចំណែកដល់កិច្ចការពារបរិស្ថានទូទៅដែលម្ចាស់អាជីវកម្មទាំងអស់នោះរួមចំណែក។

លោកថា៖ «អ្វីដែលជាសំខាន់ខ្ញុំគិតថាពីមុនមកយើងមិនទាន់បានអនុវត្តហើយដល់ពេលយើងអនុវត្តគឺយើងសង្ឃឹមថានឹងទទួលបាននូវការយល់ពីពលររដ្ឋ»។

លោកបន្ថែមថាជាមួយនឹងការប្រមូលសេវាអនាម័យបរិស្ថាននេះ ក្រសួងក៏កំពុងគិតគូរក្នុងការប្រមូលសេវាលើការប្រើប្រាស់ទឹកផងដែរ ដោយថាដើម្បីយកមករួមចំណែកក្នុងការធ្វើប្រព្រឹត្តិកម្មទឹកពីទឹកកខ្វក់ទៅជាទឹកស្អាតឡើងវិញ៕